Helga Rós Indriðadóttir

Helga Rós Indriðadóttir sópransöngkona stundaði nám við Tónlistarskólann í Reykjavík og  lauk þaðan  tónmenntakennaraprófi 1992 og  söngkennara- og  einsöngvaraprófi árið 1996.  Sama ár hóf hún nám við Staatliche Hochschule fuer Musik und Darstellende Kunst í Stuttgart.  Þar stundaði hún nám við ljóðadeild skólans og lauk árið 1999 mastersprófi frá óperudeildinni.  Fyrsta einsöngshlutverk Helgu Rósar var Poppea í Krýningu Poppeu eftir Monteverdi sem sett var upp í Wilhelma-Theater, leikhúsi óperuskólans.  Á meðan hún var enn við nám var hún fastráðin við Óperuhúsið í  Stuttgart (Staatsoper Stuttgart) og debúteraði sem Freyja í Rínargulli Wagners. 

Helga Rós var fastráðin við óperuna í Stuttgart í 8 ár og söng fjölda hlutverka m.a. Evridísi í Orfeo eftir Monteverdi, Antoníu í Ævintýrum Hoffmanns, Zerlinu í Don Giovanni, Ortlinde í Valkyrjunum,  Woglinde í Ragnarökum og Florice í  frumflutningi á Pastorale eftir Gerard Pesson.  Auk þess var hún gestasöngvari í óperuhúsunum í Bonn, Wiesbaden og Karlsruhe.    Í DVD útgáfu af aldamótauppsetningu Niflungahrings Wagners frá óperunni í Stuttgart er Helga Rós í hlutverki Freyju í Rínargullinu og Woglinde í Ragnarökum.  Hún hefur starfað með hljómsveitarstjórunum Lothar Zagrosek, Janos Kulka, Raymond Leppard, Jean-Claude Malgoire, Enrique Mazzola, Kwamé Ryan, Nicola Luisotti, Roland Kluttig, Nicolas Kok, Alessandro de Marchi og leikstjórunum Peter Konwitschny, Hans Neuenfels, Christof Nel,  Nicolas Brieger, Martin Kusej, Jossi Wieler og Joachim Schlömer

Helga Rós hefur sungið Sálumessur Mozarts og Verdis, Sköpunina, Árstíðirnar og Teresíumessu Haydns,  Elías og Paulus eftir Mendelssohn, Saul eftir Haendel, Missa Solemnis og 9. sinfóníu Beethovens, Le Laudi eftir Hermann Suter, Orfeo eftir Pergolesi og Les Illumination eftir Britten.

Hún hefur einnig sungið fjölda ljóðatónleika  bæði hér heima og erlendis með píanóleikurunum Gerrit Schuil, Önnu Guðnýju Guðmundsdóttur,  Frédéric Sommer, Elisabeth Föll, Robin Engelen, Peter Schrottner og Trio Parnassus.  Þar á meðal voru Tíbrár tónleikar í janúar 2004.   Hún hefur sungið  lög eftir íslensk tónskáld, Beethoven, Schubert, Schumann, Brahms, Wolf, V. Ullmann, Schönberg, Grieg, Sibelius, Liszt, Debussy og Britten.   Samstarfið við Guðrúnu Dalíu Salómonsdóttur píanóleikara hófst í Stuttgart en þær flytja saman Sönglög Jórunnar Viðar.